Қазақстанда тұрғын үй бағасы мен оның халық үшін қолжетімділігі өңірге қарай айтарлықтай ерекшеленеді. Мысалы, Астана мен Оралдағы шаршы метрдің орташа құны екі есеге жуық айырмашылық көрсетеді, деп хабарлайды Oimaqnews.kz  Qaz365.kz. сайтына сілтеме жасап.

Бұл туралы Отбасы банк төрағасы Ләззат Ибрагимова Taldau Talks подкастында айтты. Оның сөзінше, тұрғын үйдің қолжетімділігін бағалағанда өңірлік ерекшеліктерді ескеру қажет. Өйткені ел бойынша алынған ортақ көрсеткіш жекелеген қалалардағы нақты жағдайды көрсете алмайды.

«Өңірлер арасындағы айырмашылық өте үлкен. Астанада тұрғын үй нарығы ауқымды әрі соңғы екі жылда таңғаларлықтай өсті. Меніңше, Ұлттық статистика бюросының дерегі бойынша, қазір шаршы метрдің орташа бағасы 700 мың теңге шамасында. Ал Оралда әлі де 360 мың теңге», – деді Ибрагимова.

Осы деректерге сүйенсек, елордадағы тұрғын үйдің бір шаршы метрі Оралға қарағанда екі есеге жуық қымбат.

Ибрагимованың айтуынша, осындай айырмашылыққа байланысты тұрғын үйдің қолжетімділік көрсеткішін әр өңір бойынша бөлек есептеу қажет.

«Егер қолжетімділік көрсеткіштерін есептейтін болсақ, өңірлердегі нәтижелер мүлде әртүрлі болады», – деді банк басшысы.

Әңгіме барысында отбасының баспана сатып алуы үшін қанша жылдық табысы қажет екенін көрсететін өлшем де сөз болды. Ибрагимованың айтуынша, Отбасы банктің есебі бойынша Қазақстанда тұрғын үйдің қолжетімділік көрсеткіші шамамен төрт жылды құрайды. Ал кейбір халықаралық зерттеулерде Қазақстан үшін тоғыз жыл шамасындағы көрсеткіш келтіріледі.

Банк басшысы мұндай айырмашылықты есептеу тәсілдерінің әртүрлі болуымен түсіндірді. Қорытынды көрсеткішке таңдалған тұрғын үйдің бағасы, халықтың есепке алынатын табысы және жылжымайтын мүлік сатып алынатын өңір әсер етеді.

Ибрагимова Астанадағы жағдайға да жеке тоқталды. Шаршы метрдің бағасы жоғары болғанымен, елордада тұрғын үй құрылысының қарқыны жоғары.

Оның сөзінше, Астанада бір адамға шаққандағы тұрғын үймен қамтылу көрсеткіші 32 шаршы метрден асып кеткен.

«Астана жалпы әлемдік өлшемге жетті. Мұнда бір адамға 30 шаршы метрден келеді. Тіпті одан да көп – бір адамға 32 шаршы метр», – деді Ибрагимова.

Сонымен бірге елорданың тұрғын үй нарығы біркелкі емес. Баға мен ұсыныс көлемі қаланың оң және сол жағалауларында, сондай-ақ бастапқы және қайталама тұрғын үй нарығында айтарлықтай ерекшеленуі мүмкін.

Ибрагимова Астананы ішкі көші-қонның негізгі орталықтарының бірі деп атады. Оның айтуынша, өңірлерден елордаға жастар, соның ішінде жоғары білімді мамандар жұмыс пен кәсіби өсу мүмкіндігін іздеп белсенді көшіп келеді.

Қазір Қазақстандағы тұрғын үй құрылысының едәуір бөлігі Астана, Алматы және Шымкент қалаларына тиесілі. Алайда Отбасы банк басшысы мұны тек құрылыс қарқынымен емес, ішкі көші-қонмен және ірі қалаларда тұрғын үйге сұраныстың шоғырлануымен де байланыстырады.