Орал қаласында 18 жастағы Алсу Ермагамбетова суға батып бара жатқан жасөспірімді құтқармақ болып, өзі көз жұмды, деп хабарлайды Arasha.kz, Azattyq Rýhy-ге сілтеме жасап.

Қайғылы оқиға 16 шілде күні Жайық өзенінің Ремзауыт ауданындағы шомылуға арналмаған жағажайда болған.

Марқұмның туыстарының айтуынша, сол күні Алсу құрбысымен және таныстарымен бірге демалып, медициналық колледжге оқуға түскенін атап өткен. Біраз уақыттан кейін ол құрбысымен бірге суға тізеден кірген. Сол сәтте 16 жастағы жасөспірім тереңірек жүзіп барып, суға бата бастаған.

Алғашында оның көмек сұрағанын қалжың деп қабылдаған. Алайда жағдайдың шын екенін түсінген Алсу жүзе алмаса да, жасөспірімді құтқару үшін суға секірген.

Нәтижесінде жасөспірім аман қалғанымен, Алсуді құтқару мүмкін болмаған. Оқиға кезінде тағы бір ер адам да көмек көрсетуге тырысқан.

Марқұмның туыстарының сөзінше, Алсу Теректі ауданындағы Теректі ауылында тұрған. Ол әжесінің тәрбиесінде өсіп, мектепте жақсы оқыған, спортпен айналысқан және түрлі жетістіктерге қол жеткізген.