Халықаралық іздеуде жүрген блогер Қайсар Қамза Вьетнамнан Қазақстанға экстрадицияланып жатқан болуы мүмкін. Журналист Михаил Козачков оның Вьетнамның Камрань әуежайында құқық қорғау органдарының қызметкеріне ұқсас адамның сүйемелдеуімен бара жатқан суретін жариялады, деп хабарлайды Oimaqnews.kz Qaz365.kz.

Айта кетейік, екі миллионнан астам жазылушысы бар блогер заңсыз онлайн-казино мен құмар ойындарын жарнамалап, қылмыстық әрекеттерден ірі көлемде табыс тапты деп айыпталуда. Тергеу мәліметінше, ол Қазақстанда тыйым салынған Pin-Up және PINCO онлайн-казиноларын 400 мыңнан астам аудиториясы бар жабық Telegram-арнасы арқылы жарнамалаған. Тек криптовалютаның өзінде одан 200 мың АҚШ долларына жуық қаражат табылған.

Схеманың беті ашылғаннан кейін блогер Оңтүстік-Шығыс Азияға кетеді, ал сәуір айында оны Вьетнам күштік құрылымдары Қазақстанның Бас прокуратурасының сұрауы бойынша ұстаған болатын. Мамыр айында блогер видеожазба жариялап, өзінің тұтқындалмағанын айтқан еді.

«Мені тұтқындаған жоқ, тек миграциялық қызметте паспортымды алып қойды. Бәрі жақсы болуын тілеп қойыңыздар», – деді ол.

Еске салсақ, Қайсар Қамзаға қатысты халықаралық іздеу 2026 жылдың қаңтар айында жарияланған еді. Осы іс бойынша АҚШ азаматы Дмитры Дружинскы мен Украина азаматы Марина Левковичке де іздеу жарияланған. Тергеу нұсқасы бойынша, заңсыз бизнес лицензиясы бар ТОО «Бонами» арқылы бүркемеленіп, ақша қаражаттары шетелге және криптовалютаға шығарылып отырған.