2026 жылдан бастап мобильді аударымдар арқылы үш ай қатарынан 1 миллион теңгеден астам қаражат қабылдаған азаматтардың табысы салық органдарының бақылауына алынады, деп хабарлайды Oimaqnews.kz Qaz365.kz. сайтына сілтеме жасап.

Қаржы министрлігінің жаңа бұйрығына сәйкес, бұған дейін салықшылар жасырын кәсіпкерлік қызметті тек аударым санына қарай анықтайтын. Яғни, егер азаматқа үш ай қатарынан ай сайын 100 және одан да көп әртүрлі адамнан ақша түссе, ол кәсіпкерлікпен айналысады деп есептелетін.

Енді бұл тәртіп күшейтіледі: енді тек аударым санына емес, түскен қаражат көлеміне де назар аударылады. Егер үш ай ішінде мобильді аударымдардың жалпы сомасы ең төменгі жалақының 12 еселенген мөлшерінен асып кетсе, азаматтың табысы кәсіпкерлік ретінде қаралады.

2026 жылы ең төменгі жалақы 85 мың теңге болады. Демек, үш айда 100-ден астам мобильді аударымнан түскен сома 1,02 миллион теңгеден асса, азамат салық төлеуге міндеттеледі.

Бұл талап жеке тұлғалардың достарынан, туыстарынан алған бір реттік аударымдарына емес, жүйелі түрде табыс тауып жүрген адамдарға қатысты қолданылады.