Әлеуметтік желіде әскери ант қабылдау кезінде сарбаздың басы айналып, өзін жайсыз сезінген сәті түсірілген видео қайта тарады. Жалған ақпаратқа қарсы іс-қимыл орталығының (JAQ.Ortcom) мәліметінше, оқиға 2024 жылы Аягөз гарнизонында болған, деп хабарлайды Oimaqnews.kz.

Қорғаныс министрлігінің сол кездегі түсініктемесіне сүйенсек, сарбаз қатты толқығандықтан өзін жайсыз сезінген. Оған дер кезінде медициналық көмек көрсетілген, денсаулығына қауіп төнбеген.

JAQ.Ortcom мәліметінше, бейнежазбадағы сарбаз мерзімді әскери қызметін толық өтеп, кейін запасқа шығарылған.

Орталық архивтік видеоны оқиғаның қай кезде және қандай жағдайда болғанын көрсетпей жариялау жұртты жаңылыстыруы мүмкін екенін ескертті. JAQ блогерлер мен жаңалық парақшаларын мәліметті жарияламас бұрын тексеруге шақырды.