Қонаев гарнизонындағы әскери бөлімдердің бірінде мерзімді қызметтегі сарбаз Санжар Жанат казарманың төртінші қабатындағы терезеден құлап, ауыр жарақат алды. Бұл туралы Десанттық-шабуылдау әскерлерінің баспасөз қызметі мәлім етті, деп хабарлайды Oimaqnews.kz Qaz365.kz.сайтына сілтеме жасап.

Төтенше оқиға 2026 жылғы 3 тамызда орын алған. Сарбаз жедел түрде ауруханаға жеткізіліп, дәрігерлер оған барлық қажетті медициналық көмекті көрсетті. Десанттық-шабуылдау әскері өкілдерінің ақпаратынша, бұған дейін әскери қызметші тарапынан қызмет жағдайына байланысты ешқандай шағым түспеген. Сонымен қатар оқиғадан бір күн бұрын ол ата-анасымен кездескен, олар да әскери бөлім басшылығына наразылық білдірмеген.

Аталған факті бойынша Қазақстан Республикасы Ішкі істер министрлігінің Әскери-тергеу басқармасы қылмыстық іс қозғады.

Өз кезегінде Қорғаныс министрлігі қызметтік тексеру тағайындап, оқиғаның мән-жайын толық зерттеу үшін арнайы комиссия құрды. Қазіргі таңда құқық қорғау органдары мен сарапшылар сарбаздың қалай және қандай жағдайда құлағанын анықтап жатыр.