«Қазгидромет» синоптиктерінің мәліметінше, алдағы күндері солтүстік, шығыс және орталық өңірлерде түнгі уақытта үсік сақталады.

Мамандардың айтуынша, суық ауа массалары 13 мамырда елдің оңтүстік-шығысына да жетуі мүмкін. Кей өңірлерде түнде ауа температурасы нөлден төмен түседі.

Астанада 12 мамырда түнде -1…-3 градусқа дейін үсік жүреді. Күндіз ауа температурасы +13…+15 градус шамасында болады. Жел күшейіп, екпіні секундына 20 метрге дейін жетеді.

13 мамырда елордада жаңбыр жауып, найзағай болуы мүмкін. Ал 14 мамырда жауын-шашынсыз, күн біртіндеп жылына бастайды.

Алматыда 12 мамырда жаңбыр мен найзағай күтіледі. Түнде кей жерлерде қатты жаңбыр жаууы мүмкін. Ауа температурасы күндіз +14…+16 градус болады. Бірақ 13–14 мамырда күн ашылып, ауа +21 градусқа дейін жылиды.

Шымкентте алдағы үш күнде жауын-шашын болмайды. Керісінше, күн ысып, 14 мамырда ауа температурасы +28 градусқа дейін көтеріледі.

Синоптиктер тұрғындарға ауа райының күрт өзгеруіне байланысты сақ болуға кеңес береді. Әсіресе бағбандар мен диқандарға үсік қаупін ескеріп, өсімдіктерді қорғау шараларын қолға алу ұсынылды.