Бүгін Шерзат Полаттың өліміне қатысты екі айға жалғасқан сот процесі аяқталды.

Сот үкімімен Абзал Шынасыл – 23 жылға, Равиль Сакиев – 20 жылға, Азамат Тоқтаубаев – 15 жылға, Нұрқияс Ілиясов –  9 жылға, Шыңғыс Белғожаев – 7 жылға, Дархан Әскентай – 7 жылға, Нұрбол Тоқтаубаев – 7 жылға, Дидар Қалиахмет – 7 жылға, Думан Ысқақ – 1 жыл 6 айға бас бостандығынан айырылды.

Судья Ержан Жанұзақов сотталғандардың арасында бұрын сотты болған Азамат Тоқтаубаев пен Нұрқияс Ильясовтің жазалары өтелмегені үкім шығарарда ескерілгенін айтады.

"Сот сотталушылардың жеке басын, олардың бір бөлігінің бұрын сотты болғандарын ескерді.
Атап айтқанда, Азамат Тоқтаубаев пен Нұрқияс Ильясовке бұрынғы соттылықтарының өтелмеген жазаларын ескеріп, 15 және 9 жылға бас бостандығынан айыру жазасы тағайындалды. Бұл мерзімдер, жоғарғы шегіне жақын", – деді судья.