Рахат Тұрлыханов тағы да отбасылық жанжалға байланысты полицияға жеткізілді, деп хабарлайды Oimaqnews.kz Politico.kz.сайтына сілтеме жасап. 
Бұған дейін БАҚ-та 15 наурыз күні Рахат Тұрлыхановтың әйелін ұрды деген күдікпен ұсталғаны туралы ақпарат тараған. Оқиғадан кейін ол Алматы қаласы Медеу аудандық полиция басқармасына жеткізілгені хабарланған.

Алматы қалалық полиция департаменті редакцияның сауалына жауап беріп, әншінің әйеліне күш қолданды деген күдікпен полицияға жеткізілгенін растады.

«Алматы қаласының Медеу ауданында болған отбасылық жанжал бойынша түскен шақыртуға полиция қызметкерлері барып, оқиғаға қатысушыларды аудандық полиция басқармасына жеткізді», — деп хабарлады полиция.

Ведомство мәліметінше, тексеру барысында әйел бастапқыда өзіне күш қолданылғанын айтқан, алайда кейіннен соққы фактісін жоққа шығарып, тек отбасылық жанжал болғаны туралы арыз жазған.

Тексеру нәтижесінде ер адамға қатысты Әкімшілік құқық бұзушылық туралы кодекстің 73-бабы 1-бөлігі («Отбасылық-тұрмыстық қатынастар саласындағы құқыққа қарсы әрекеттер») бойынша әкімшілік хаттама толтырылған.