Қырғызстан Қазақстанға ауыр экономикалық қылмыс жасады деген күдікке ілінген азаматты экстрадициялады.

Бас прокуратураның мәліметінше, күдікті 2023 жылы іс жүзінде орындалмаған жұмыстар бойынша жалған шот-фактуралар рәсімдеу арқылы заңсыз схема ұйымдастырған. Соның салдарынан мемлекетке ірі көлемде залал келтірілген. Келтірілген шығын көлемі шамамен 350 миллион теңгені құрайды.

Қылмыс жасалғаннан кейін азамат халықаралық іздеуге жарияланған. Ол Қырғызстан аумағында ұсталып, Қазақстан тарапының сұрауы бойынша елге берілді.

Қазіргі уақытта күдікті тергеу изоляторына қамалды. Оған қатысты қылмыстық іс қозғалып, тергеу амалдары жүргізіліп жатыр. Заң бойынша аталған баптар негізінде оған жеті жылға дейін бас бостандығынан айыру жазасы тағайындалуы мүмкін.