Экономика министрлігі 2029 жылға дейінгі инфляция болжамын жариялады

Премьер-министрдің орынбасары – Ұлттық экономика министрі Серік Жұманғарин 2027–2029 жылдарға арналған республикалық бюджет жобасын таныстыру кезінде Қазақстанда инфляция 2029 жылға қарай төмендеуі мүмкін екенін мәлімдеді. Қазақстанда инфляция деңгейі 2027 жылы 7,5–9,5%, ал 2028–2029 жылдары 6–8% аралығында болады.

Министрдің айтуынша, алдағы үш жылда инфляцияны біртіндеп төмендету көзделген.

"Инфляция бойынша болжамда оның біртіндеп төмендеуі қарастырылған. 2027 жылы болжамды дәліз 7,5–9,5%, ал 2028–2029 жылдары 6–8% деңгейінде белгіленді", – деді Серік Жұманғарин.

2027 жылы республикалық бюджет кірісі 19 триллион теңге көлемінде болжанып отыр. Бұл жалпы ішкі өнімнің 10 %-ына тең. Биылғы жылға арналған бағалаумен салыстырғанда бюджет кірісі 2,8 триллион теңгеге артуы мүмкін.

Жұманғариннің сөзінше, кірістің өсуіне экономиканың кеңеюі, қосылған құн салығын қайтару көлемінің азаюы және басқа да факторлар әсер етеді. Атап айтқанда, экономикалық өсім есебінен бюджет кірісі 1,7 триллион теңгеге, қосылған құн салығын қайтару сомасының төмендеуінен 1,1 триллион теңгеге, өзге факторлар есебінен 500 миллиард теңгеге ұлғаяды деп күтіледі. Сонымен қатар салық түсімдері 500 миллиард теңгеге азаюы мүмкін.

Бюджет жобасына сәйкес, Ұлттық қордан кепілдендірілген трансферт көлемі 2027 және 2028 жылдары 2,43 триллион теңгеден, ал 2029 жылы 2 триллион теңгені құрайды.

Бұдан бөлек, 2027 жылы қордан 2 триллион теңге нысаналы трансферт ретінде бөлу жоспарланып отыр. Ал 2028 және 2029 жылдары бұл мақсатқа 1,5 триллион теңгеден бағытталмақ.

"Қаражат аса маңызды нысандар мен жалпыұлттық маңызы бар жобаларды қаржыландыруға жұмсалады", – деді министр.

Болжам бойынша, Ұлттық қордың таза валюталық активтері 2027 жылы 65,2 миллиард доллар, 2028 жылы 67,3 миллиард доллар, ал 2029 жылы 70,6 миллиард доллар болады.

Ұлттық экономика министрлігі алдағы жылдары инфляцияның төмендеуін болжап отырғанымен, бағаның өсуі әлі де өзекті мәселе болып отыр.

Тамыз айының қорытындысы бойынша Қазақстанда жылдық инфляция 9,8 %-ға дейін баяулады. Бір айда тұтыну бағалары 0,6 %-ға өскен. Инфляцияның баяулауына азық-түлік бағасының өсу қарқынының төмендеуі ықпал етті: жылдық азық-түлік инфляциясы шілдедегі 10,1 пайыздан тамызда 9,5 %-ға дейін азайды.

Ал Ұлттық банктің болжамы бойынша, 2026 жылдың қорытындысында Қазақстандағы инфляция 9–12 % аралығында болуы мүмкін. 

Жалпы айтқанда, бұл болжам Қазақстанда бағаның өсу қарқыны алдағы жылдары баяулауы мүмкін екенін білдіреді. Алайда бұл тауарлар мен қызметтердің бағасы арзандайды деген сөз емес. Мысалы, инфляция 2027 жылы 7,5–9,5 % болса, баға орта есеппен осы мөлшерде өсуі мүмкін. Ал 2028–2029 жылдары инфляция 6–8 %-ға дейін төмендесе де, баға өсуін жалғастырады. Яғни халықтың күнделікті шығыны бірден азаймайды, тек бағаның өсу қарқыны баяулауы ықтимал.