Нью-Йорктегі федералдық соттың судьясы Элвин Хеллерстайн Венесуэланың бұрынғы президенті Николас Мадуро мен оның жұбайы Силия Флореске қатысты қылмыстық істі қарау 2027 жылғы 1 маусымда басталатынын жариялады, деп хабарлайды CNN politics.

Сот отырысында федералдық прокурорлар мен қорғаушылар сот процесін маусым айына белгілеуді бірлесіп ұсынды. Дегенмен тараптар құпия материалдарға қол жеткізу секілді мәселелер кестеге әсер етуі мүмкін екенін жоққа шығармады. Судья мұндай құжаттарды зерттеу ұзаққа созылуы ықтимал екенін атап өтті.

Мадуроның адвокаты Барри Поллак белгіленген мерзімнің шынайы екенін айтып, күтпеген қиындықтар туындаса, бұл туралы сотқа хабарланатынын жеткізді. Сонымен қатар қорғау тарапы істі тоқтату туралы өтініш беріп, Мадуроның мемлекет басшысы ретінде иммунитетке ие болғанын алға тартпақ.

Сот отырысына Николас Мадуро мен Силия Флорес түрме киімімен келді. Мадуро сот залына кіргенде қорғаушыларымен амандасып, жиналғандарға қол бұлғап шыққан.

АҚШ прокуратурасының мәліметінше, ерлі-зайыптылар қаңтар айында Каракастағы резиденциясында жүргізілген әскери операция кезінде ұсталып, кейін Нью-Йоркке жеткізілген. Оларға қару-жарақ пен кокаинді АҚШ аумағына заңсыз жеткізуге бағытталған ұзақ жылдарға созылған астыртын сөз байласуға қатысты айып тағылған. Алайда Мадуро мен Флорес кінәларын толық мойындамай отыр. Қазіргі уақытта олар Бруклиндегі федералдық тергеу изоляторында қамауда отыр.