Шешуші матчта ұлттық құрама Оңтүстік Корея командасымен кездесті.

Жағажай Азиадасындағы соңғы ойында қазақстандық спортшылар қарсыласын 3:0 есебімен ұтты (4:2, 2:1, 3:2). Осы жеңістің арқасында команда қола медальға қол жеткізді.

Айта кетейік, Саньядағы су добы жарыстары айналмалы жүйе бойынша өтті, яғни әр команда бір-бірімен кездесті. Қазақстан құрамасы бес матчтың үшеуінде жеңіске жетіп, екі ойында жеңіліп қалды.

Жағажайдағы Азия ойындарында ел намысын Темірлан Балфанбаев, Сұлтан Шонжігітов, Мұрат Шәкенов, Эдуард Цой, Руслан Ахметов, Александр Еремин және Алдияр Әкімбай қорғады.

Осылайша, Қазақстан құрамасының қоржынындағы жүлде саны жетіге жетті. Бұған дейін джиу-джитсудан Нұржан Батырбеков чемпион атанса, су добынан әйелдер құрамасы күміс медаль жеңіп алған еді. Сондай-ақ Батыр Теңізбай, Сейілхан Болатбек және Әлинұр Қуатұлы джиу-джитсудан қола жүлдеге ие болды. Ал Ришат Хайбуллин спорттық құзға өрмелеуден үздік үштікті түйіндеді.