Қазақстандық продюсер әрі актриса Баян Алагөзова «Қыз Жібек» фильміндегі қамзолға қатысты әлеуметтік желіде өршіген талқылауға пікір білдірді, деп хабарлайды Oimaqnews.kz.

Алагөзованың сөзінше, бүгінде қызу талқыға түскен бұл бұйым ұзақ уақыт бойы ешкімнің есінде болмаған.

«Мен өзім де қатты таңғалдым. Неге бұл қамзол 50 жылдан астам уақыт ешкімге керек болмады? Неге осы уақытқа дейін ешкім іздемеді? Әйгілі фильмнің костюмдері қайда? Оларды кім сақтап қалды? Шынын айтқанда, ешкім сақтамаған», – деді ол.

Продюсердің айтуынша, қамзол ешқандай ресми тізімде жоқ және жылдар бойы жеке адамның қолында сақталған.

«Бұл киім ешкімге міндетті емес. Ол ешбір құжатта тіркелмеген. Оны бір қарапайым әйел үйінде сақтап келген. Кейін сол кісі бұл бұйым сенімді қолда болғанын қалап, маған беруді дұрыс көрді. Мұражайда шаң басып тұрғаннан гөрі, қадірін білетін адамда болғанын жөн санаған», – деп түсіндірді Алагөзова.

Айта кетейік, бұл жағдай қоғамда тарихи мұраның тағдырына қатысты қызу пікірталас тудырып, мәдени құндылықтардың сақталуы мәселесін қайта көтерді.