Қазақстандық мәнерлеп сырғанаушы, Италияда өткен Олимпиада ойындарының чемпионы Михаил Шайдоров ISU Skating Awards халықаралық сыйлығына үміткерлер қатарына енді, деп хабарлайды Oimaqnews.kz 

Sports.kz порталының мәліметінше, дауыс беру төрт номинация бойынша өтеді: «Үздік костюм», «Ойын-сауық бағдарламасы», «Үздік хореограф» және «Үздік жаттықтырушы».

Италияда өткен 2026 жылғы Олимпиада чемпионы Михаил Шайдоров «Үздік костюм» номинациясы бойынша үміткерлер тізіміне енгізілді. Бұл номинацияға ол Олимпиададағы еркін бағдарламасында киген сахналық киімі үшін ұсынылып отыр.

Әзірге бұл – лонг-лист кезеңі. Жанкүйерлердің онлайн дауыс беруі 18 наурызға дейін жалғасады. Нәтижесінде әр санатта үш үміткерден ғана қалып, финалдық номинанттар анықталады. Ал жеңімпаздардың есімі 29 наурыз күні Прагада өтетін әлем чемпионатының банкетінде жарияланбақ.

Айта кетейік, аталған номинацияда Шайдоровпен бірге америкалық Илья Малинин, эстониялық Александр Селевко және жапониялық Каори Сакамото сынды спортшылар да үміткерлер қатарында бар.