Әңгіме барысында тараптар қазақ-қырғыз қатынастарының тұрақты дамып келе жатқанын атап өтті.

Мемлекет басшысы екі ел арасындағы оң динамикаға тұрақты саяси диалог, сондай-ақ үкіметтер мен іскер топтардың белсенді байланысы ықпал етіп отырғанын айтты. Президенттер сауда-экономика, көлік-логистика және су-энергетика салаларындағы ынтымақтастықтың қарқынды дамуына ерекше тоқталды.

Сондай-ақ тараптар достық, стратегиялық серіктестік және одақтастық рухындағы мемлекетаралық байланыстарды одан әрі кеңейтуге дайын екенін растады. Қасым-Жомарт Тоқаев Қазақстанда жүргізіліп жатқан конституциялық реформалар туралы айтып, бұл өзгерістер елдің одан әрі дамуына негіз болатынын жеткізді. Садыр Жапаров Қазақстандағы жаңғырту үдерістерін қолдайтынын мәлімдеді.

Әңгіме барысында өңірлік ынтымақтастық мәселелері де талқыланды. Қазақстан Президенті Бішкекте өтетін ШЫҰ саммиті мен Дүниежүзілік көшпенділер ойындарының сәтті өтуіне тілектестік білдірді. Сонымен қатар Тоқаев Қырғызстан басшысының ел бірлігін сақтауға және мемлекеттілікті нығайтуға бағытталған шешімдерін қолдайтынын айтты.