Отбасы банк тұрғын үй кезегінде тұрған азаматтарға қатысты маңызды жаңашылдықты хабарлады. Енді кезекте тұрған адамның қандай да бір тұрғын үйде үлесі болса да, ол мемлекеттік қолдаудан қағылмайды, деп хабарлайды Oimaqnews.kz  Qaz365.kz.сайтына сілтеме жасап.

Банктің мәліметінше, бұдан былай үлестік меншігі бар азаматтар да жеңілдетілген ипотека немесе жалдамалы мемлекеттік тұрғын үй алу мүмкіндігіне ие болады. Бұған дейін ережелер қатаң болып, кезекте тұрған адамның пәтерде тіпті шағын үлесі анықталса, оған мемлекеттік тұрғын үй де, жеңілдетілген несие де берілмейтін.

«Енді тұрғын үйде үлесі бар болса да, азамат мемлекеттік қолдау ала алады. Бұрын мұндай жағдайда кезектегі адамға автоматты түрде бас тарту берілетін», – деп түсіндірді банкте.

Аталған мәселе әзірге заңнамалық деңгейде толық реттелмегенімен, «Отбасы банк» азаматтардан түскен көптеген өтінішті ескере отырып, үлестік меншігі бар кезектегілерді есепке алу туралы шешім қабылдаған.

Банктің хабарлауынша, бұл мүмкіндік ақпан айынан бастап қолжетімді болады.

Жаңашылдық тұрғын үй кезегінде тұрған азаматтардың құқығын кеңейтіп, мемлекеттік қолдауға қол жеткізу аясын ұлғайтуға бағытталған.