Түркістан облысында блогерлікпен айналысқан 32 жастағы әйел бопсалау дерегі бойынша күдікке ілінді, деп хабарлайды Qaz365.kz тілшісі Polisia.kz-ке сілтеме жасап.

Облыстық полиция департаментінің ұйымдасқан қылмысқа қарсы күрес басқармасы жүргізген жедел-іздестіру іс-шаралары барысында күдікті ұсталған. Алдын ала мәлімет бойынша, ол өзін қоғамдық белсенді ретінде таныстырып, Келес ауданындағы медициналық мекеме басшысынан әлеуметтік желілерде беделіне нұқсан келтіретін ақпарат таратпау үшін 1 миллион теңге талап еткен.

Аталған дерек бойынша қылмыстық іс қозғалып, заттай айғақтар тәркіленді. Қазіргі уақытта оқиғаның барлық мән-жайын анықтауға бағытталған сотқа дейінгі тергеу амалдары жүргізіліп жатыр.

Полиция заң аясында тиісті шешім қабылданатынын мәлімдеді.